Koha kur hamë, shpejtësia me të cilën konsumojmë ushqimin dhe madje edhe sa e përtypim atë, ndikojnë drejtpërdrejt në mënyrën se si trupi ynë përthith kaloritë.
Për vite me radhë është menduar se çelësi për të mbajtur peshën është balanca mes kalorive që marrim dhe atyre që djegim. Por studimet e fundit tregojnë se kjo është vetëm një pjesë e së vërtetës. Në trup zhvillohet një proces kompleks biologjik, ku ndikojnë lloji i ushqimit, mënyra si e konsumojmë dhe mikroorganizmat që jetojnë në zorrë.
Ekspertët theksojnë se njerëz të ndryshëm e metabolizojnë të njëjtin ushqim në mënyra të ndryshme, çka shpjegon pse disa persona shtojnë më lehtë në peshë se të tjerët.
Koha kur hamë ka rëndësi
Studimet tregojnë se personat që konsumojnë pjesën më të madhe të kalorive në mëngjes humbin më shumë peshë krahasuar me ata që hanë më shumë në darkë, edhe pse marrin të njëjtin total kalorish. Gjithashtu, kufizimi i orarit të ushqimit gjatë ditës mund të ulë marrjen e kalorive dhe yndyrën trupore.
Të ngrënit herët gjatë ditës ndihmon metabolizmin, ndërsa ushqimi pas orës 21:00 lidhet me rritje të sheqerit në gjak dhe kolesterolit të keq, duke rritur rrezikun për obezitet dhe sëmundje kardiovaskulare.
Shpejtësia e të ngrënit ndikon në sasinë që konsumojmë
Personat që hanë shpejt priren të konsumojnë më shumë kalori. Kjo sepse trupit i duhen rreth 15 deri në 60 minuta për të aktivizuar hormonet që japin ndjesinë e ngopjes.
Të ngrënit më ngadalë ndihmon në kontrollin e oreksit, përmirëson kujtesën për ushqimin e konsumuar dhe ul dëshirën për të ngrënë më vonë. Po ashtu, ndikon pozitivisht edhe në nivelin e sheqerit në gjak.
Edhe mënyra si përpunohet ushqimi ka ndikim
Struktura e ushqimit përcakton sa kalori përthith trupi. Për shembull, bajamet e bluara japin më shumë kalori sesa ato të plota, ndërsa një mollë e plotë të ngop më shumë se pureja e saj.
Ushqimet e përpunuara konsumohen më shpejt dhe përthithen më lehtë, duke çuar shpesh në marrje më të madhe kalorish.
Roli i mikrobiomës
Një tjetër faktor i rëndësishëm është mikrobioma e zorrëve. Bakteret në trup ndryshojnë nga një person te tjetri dhe ndikojnë në mënyrën si përthithen dhe përdoren kaloritë.
Studimet tregojnë se edhe persona me të njëjtën dietë mund të kenë reagime shumë të ndryshme në nivelin e sheqerit dhe yndyrnave në gjak.
Përfundimi
Ekspertët rekomandojnë një dietë të pasur me fibra, fruta dhe perime, duke kufizuar sheqerin, kripën dhe yndyrnat. Por mbi të gjitha, mënyra si hamë – jo vetëm çfarë hamë – është thelbësore për shëndetin dhe peshën trupore.
