Dy shtetas shqiptarë, kushërinj mes tyre, janë ekstraduar drejt Italisë pasi rezultonin në listën e 100 personave më të kërkuar nga autoritetet italiane. Bëhet fjalë për Andon (alias Afrim) Sina, 52 vjeç, dhe Niko (alias Faslli) Sina, 49 vjeç, banues në fshatin Rreth-Kalë, në Dibër. Sipas njoftimit zyrtar të Policisë së Shtetit, ata ishin dënuar për vepra të rënda penale, përfshirë vrasje me dashje në bashkëpunim dhe vrasje të mbetur në tentativë.
Dy të ekstraduarit ishin shpallur në kërkim ndërkombëtar nga autoritetet italiane që prej vitit 1999 dhe dyshohet se për vite me radhë janë fshehur në zonën e Dibrës duke përdorur identitete të rreme.
Ata janë dënuar me vendim të formës së prerë nga Gjykata e Apelit e Napolit në vitin 2006, me nga 14 vjet e 11 muaj burgim secili.
Ngjarja për të cilën janë dënuar daton më 22 shtator 1999, në komunën Gricignano d’Aversa, Itali, ku dyshohet se, për motive që lidhen me ndarjen e të ardhurave nga aktivitete të paligjshme, kanë vrarë një shtetas shqiptar dhe kanë plagosur rëndë një tjetër.
Sipas burimeve, dy kushërinjtë janë arrestuar vitin e kaluar në Dibër, ku vijonin të qëndronin të fshehur nën identitete të rreme. Ekstradimi i tyre drejt Italisë u realizua këtë të premte, në kuadër të bashkëpunimit ndërkombëtar mes autoriteteve shqiptare dhe atyre italiane në luftën kundër krimit të organizuar.
