Një “duel të heshtur” mes gazetareve vip ka ndodhur sot në mediat shqiptare: Arbana Osmani dhe Grida Duma kanë zhvilluar një garë të ethshme për intervistën me Elsa Lilën.
Po se çfarë ka pasur kaq të rëndësishme për të thënë Elsa Lila, hajde merre vesh. Se nuk është se ka sjellë ndonjë këngë të re apo ka ndryshuar diçka madhore në jetën e saj. Thjesht ka ardhur në Shqipëri dhe me këtë rast ka dhënë edhe ndonjë intervistë — e cila na kujton edhe një herë një të vërtetë të ëmbël dhe të hidhur të gazetarisë VIP: asgjë live, gjithçka e regjistruar dhe e kuruar deri në sekondën e fundit.
Por kjo nuk i pengoi dy zonjat e ekranit të futeshin në një mini-garë “kush e ka ekskluziven më të ndjekur”.
Grida, që zakonisht i publikon episodet e podcastit të saj ditën e diel, bëri një devijim strategjik: e nxori intervistën të enjten në orën 18:00, një hap që u lexua si lëvizje për t’i prerë rrugën Arbanës.
Ndërkohë, Arbana — e mësuar me terrenin e audiencës masive — nuk priti as orën 18:00. Ajo publikoi intervistën që në mëngjes, duke e shndërruar ditën në një sprint klikimesh dhe duke e vënë vulën e parë të “ekskluzivitetit”. Të një ekskluziviteti qe veç vulës nuk ka asgjë ekskluzive.
Rezultati?
Elsa nuk solli ndonjë lajm të madh, por solli një garë: kush publikon e para, kush ka më shumë klikime, kush pretendon primatin e bisedës me një artistë që-le ta themi-ishte më shumë arsye për duelin Grida-Arbana sesa për atë që përcolli intervista.
Në fund, pyetja më e madhe nuk ishte “çfarë tha Elsa”, por: Si ka ndodhur që gara për t’u dukur ekskluziv është kthyer më interesante sesa ajo që thuhet?
