Ylli i Barcelonës, Lamine Yamal, është shpallur “Lojtari i Sezonit” në La Liga për edicionin 2025/2026, në çmimin e ndarë nga La Liga në bashkëpunim me EA Sports.
Talenti spanjoll ishte një nga protagonistët kryesorë në suksesin e Barcelonës, e cila arriti të mbrojë titullin kampion duke e mbyllur sezonin me 94 pikë.
Paraqitjet e shkëlqyera të Yamal gjatë gjithë kampionatit i siguruan atij çmimin individual më prestigjioz të sezonit, duke lënë pas emra të njohur si Kylian Mbappe, Vedat Muriqi, Nicolas Pepe dhe Pablo Fornals.
Me fanellën e Barcelonës, 18-vjeçari zhvilloi një sezon mbresëlënës, duke realizuar 16 gola dhe 12 asistime në La Liga, statistika që e shndërruan në një nga lojtarët më vendimtarë të kampionatit.
Kontributi i tij në ndeshjet kryesore të sezonit ishte vendimtar për suksesin e skuadrës katalanase, ndërsa ky çmim konfirmon statusin e tij si një nga talentet më të mëdha të futbollit botëror.
