Antonio Conte konsiderohet kandidati ideal për të marrë drejtimin e kombëtares italiane, por vetëm nëse pranon një projekt afatgjatë deri në vitin 2030. Kështu shkruan La Gazzetta dello Sport, e cila e sheh trajnerin aktual të Napolit si figurën ideale për të rikthyer “Azzurrët” në Kupën e Botës.
Sipas raportimeve, Conte pritet të largohet nga Napoli pas dy sezonesh dhe sfida ndaj Udineses në “Stadio Maradona” mund të jetë e fundit për të në krye të skuadrës napolitane.
Trajneri italian shihet si kandidati kryesor për t’u rikthyer në Coverciano, aty ku drejtoi Italinë nga viti 2014 deri në 2016. Edhe pse kombëtarja e asaj kohe nuk konsiderohej ndër më të talentuarat, Conte arriti ta çonte ekipin deri në çerekfinalet e UEFA Euro 2016, ku Italia u eliminua nga Gjermania pas penalltive.
“La Gazzetta dello Sport” vlerëson aftësinë e Contes për të motivuar skuadrën në momente të vështira, duke e konsideruar atë si njeriun e duhur për një tjetër proces rindërtimi të futbollit italian.
Gazeta ndalet edhe te emra të tjerë të përfolur për stolin e Italisë. Pep Guardiola do të sillte entuziazëm të madh, por filozofia e tij e lojës kërkon punë të përditshme me skuadrën, diçka që sipas mediumit nuk përshtatet plotësisht me ritmin e kombëtares.
Ndërkohë, Roberto Mancini, që fitoi UEFA Euro 2020 me Italinë, kritikohet për largimin drejt Arabisë Saudite në vitin 2023.
Sipas “Gazzetta”, rikthimi i Contes duhet të lidhet me një objektiv të qartë: kualifikimin e Italisë në 2030 FIFA Ëorld Cup, pas tre dështimeve radhazi për të qenë pjesë e turneut më të madh të futbollit.
Gazeta thekson se Italia nuk ka më luksin e projekteve afatshkurtra dhe se vetëm një angazhim katërvjeçar nga Conte mund të rikthejë “Azzurrët” aty ku dikur dominonin futbollin botëror.
