“Industria e Holokaustit” shqyrton një nga operacionet propagandistike më të mëdha e të sofistikuara të kohës sonë: instrumentalizimin e tragjedisë së Holokaustit nga shteti i Izraelit dhe grupe interesi në Shtetet e Bashkuara të Amerikës, për të nxjerrë përfitime politike, financiare, si dhe për të parandaluar dhe shuar çdo kritikë ndaj politikave shtetërore të tyre. Në njërin krah, këta “industrialistë” të Holokaustit (që rëndom nuk janë viktimat e Holokaustit), duke instrumentalizuar dhe rishpikur “kujtesën” rreth tij, kanë qenë në gjendje të përfitojnë pozita gjeopolitike dominante në politikën globale; kanë arritur gjithashtu të zhvatin përfitime të jashtëzakonshme financiare nga “fajtorët” e Holokaustit, përfitime që rrallë kanë shkuar për viktimat e vërteta, apo për t’i dhënë peshë historike tragjedisë së çifutëve europianë. Në krahun tjetër, çdo kundërshtim i këtij dominimi dhe kësaj zhvatjeje, por sidomos çdo oponencë ndaj represionit, sabotimit, zaptimit dhe masakrave të Izraelit në Palestinë, është damkosur me vulën e “antisemitizmit”, si metodë efikase heshtjeje e çdo zëri kundër këtyre praktikave.
Ndonëse libri është botuar plot 25 vjet më parë, “industria” e Holokaustit është sot më e gjallë se kurrë, qoftë në ShBA, ku studentë e aktivistë burgosen e dëbohen për ushtrimin e fjalës së lirë, qoftë në makinerinë luftarake dhe propagandistike të shtetit të Izraelit dhe mbështetësve e tij, të cilët tashmë e kanë shpalosur haptazi synimin strategjik të spastrimit etnik të palestinezëve në Gaza dhe në gjithë territorin e Palestinës.
Norman G. Finkelstein është studiues dhe aktivist amerikan, si dhe një ndër njohësit më të mirë të konfliktit izraelito-palestinez në Perëndim, çështje për të cilën ka shkruar e vazhdon të shkruajë.
