Ish-kryeministri Sali Berisha ka paralajmëruar ngritjen e një Komisioni Hetimor parlamentar për të hetuar veprimet e kreut të Prokurorisë së Posaçme, Altin Dumani. Në një konferencë për mediat, Berisha e akuzoi Dumanin si aktor kyç pas kryeministrit Edi Rama në atë që ai e quajti "krim elektoral" dhe “kapje të shtetit”.
Sipas Berishës, regjimi aktual në Shqipëri përfaqëson një formë të re diktature autoritare, e cila nuk bazohet në ideologji, por në kontrollin e drogës dhe krimit të organizuar. Ai theksoi se kjo strukturë kriminale ka kapur të gjitha institucionet, përfshirë drejtësinë, policinë dhe procesin zgjedhor.
"Diktatura autoritare e Shqipërisë ka si forcë lëvizëse drogën. Kjo diktaturë emëron ministra, drejtorë policie, gjyqtarë dhe mban peng prokurorë si Altin Dumani. Dosjet 339 dhe 184 u amnistuan me urdhërin e tij, duke i dhënë Partisë së Krimit një licencë për të shkatërruar çdo proces zgjedhor të ardhshëm," deklaroi Berisha.
Lideri i opozitës u shpreh se do të nisë një fushatë intensive për të ndërgjegjësuar qytetarët që të mbrojnë votën dhe liritë e tyre.
I pyetur nëse kjo iniciativë përfshin ngritjen e një komisioni hetimor parlamentar për Altin Dumanin, Berisha u përgjigj: "Të gjitha janë të mundshme, jo vetëm për Dumanin. Ai është bashkëpunëtor i Edi Ramës në manipulimin e zgjedhjeve. Ky është objektivi ynë: rikthimi i votës së lirë të shqiptarëve."
Në fund të deklaratës, Berisha premtoi se shumë të dhëna të reja do të bëhen publike në ditët në vijim përmes asaj që e cilësoi si "periudha e laptopit", duke akuzuar Ramën si “bastard i një xhelati komunist”.
