Gjyqtari dhe kreu i Unionit të Gjyqtarëve, Gerd Hoxha, ka mbrojtur në një intervistë për Top Channel draftin e ri të Kodit Penal, duke e cilësuar si një dokument që nuk është ende përfundimtar dhe që do të përmirësohet përmes konsultimeve publike. Ai theksoi se në hartimin e tij janë përfshirë përfaqësues nga të gjitha nivelet e gjyqësorit, pedagogë të nderuar, avokatë dhe partnerë ndërkombëtarë.
Për kritikat ndaj natyrës represive të disa neneve, përfshirë edhe ato që prekin mediat apo që parashikojnë burg për përbaltjen e figurave si presidenti apo dëshmorët e atdheut, Hoxha deklaroi se janë marrë modele nga vende të përparuara si Gjermania, Franca dhe Italia. “Gjithsesi, ky është një draft”, tha ai.
Por ndërsa Hoxha flet për gjithëpërfshirje dhe standarde të larta profesionale, kujtojmë se më 23 prill 2024, Gjykata Kushtetuese e skualifikoi përfundimisht nga gara për në Gjykatën e Posaçme për Korrupsion dhe Krim të Organizuar (GJKKO).
Shkaku i skualifikimit? Një fotografi me kryebashkiakun e Tiranës, Erion Veliaj, që ngriti pikëpyetje mbi pavarësinë e tij.
