Komisioni i Ankimimeve dhe Sanksioneve (KAS) ka rrëzuar përfundimisht përpjekjen për të anashkaluar renditjen ligjore të listës së koalicionit “Nisma Shqipëria Bëhet – Adriatik Lapaj”, duke rikthyer mandatin në duart e kandidates së renditur të parën: Ana Kosta Dajko.
Në një vendim të plotë dhe të argumentuar juridikisht, KAS thekson se dorëheqjet e kandidatëve të firmosura në datën e zgjedhjeve dhe të depozituara në KQZ, nuk prodhojnë asnjë efekt ligjor. Po ashtu, tentativat për të tërhequr këto dorëheqje disa javë më vonë, u cilësuan veprime jashtë çdo kuadri ligjor dhe kompetence të KQZ-së. Lista e mbyllur është e pandryshueshme pas miratimit dhe çdo manipulim mbi të është juridikisht nul.
Gjithë skema me 12 deklarata dorëheqjeje të firmosura në datën 11 maj nga kandidatët e listës, rezultoi të ishte jo vetëm e pavlefshme, por edhe në kundërshtim të hapur me parimet e Kodit Zgjedhor dhe Kushtetutës. KAS vuri në dukje se kandidimi nuk është pronë private e partive politike, dhe as nuk administrohet me marrëveshje të heshtura në korridore apo në zyrat e noterëve.
Në këtë mënyrë, tentativa për të sjellë në Kuvend një emër tjetër nga renditja e listës, dështoi. Mandati, sipas vendimit të KAS, i takon kandidatit të parë në listën e mbyllur – Ana Kosta Dajko – dhe vetëm ajo ka të drejtën ligjore për ta pranuar ose refuzuar atë, jo përmes partisë, por përmes komisionit parlamentar të Kuvendit, ashtu siç parashikon Kushtetuta.
Vendimi i KAS është i bazuar në një lexim të saktë dhe të drejtpërdrejtë të Kodit Zgjedhor dhe tregon se kandidatura nuk është një pozicion që negociohet, por një proces që zhvillohet sipas rregullave të shtetit ligjor.
Ligji dhe jo fisi në dyert e noterëve vendosin për mandatin në një listë ku hilet të nxjerrin bojën atëherë kur nuk e pret.
