Pasditen e së hënës, një zjarr ka përfshirë zonën e Godullës, në bregdetin e Semanit, një habitat i rëndësishëm për speciet migratore të egra dhe me bimësi të veçantë. Shkaqet e zjarrit mbeten ende të paqarta, ndërsa era e fortë ka favorizuar përhapjen e flakëve në këtë mjedis natyror delikat.
Zjarrfikësit e Fierit kanë arritur në vendin e ngjarjes, megjithatë ndërhyrja e tyre është bërë e pamundur për shkak të rrethimit nga uji, çka e vështirëson aksesin me mjetet e nevojshme.
Autoritetet janë në monitorim të vazhdueshëm të situatës, ndërsa shqetësim mbetet dëmtimi i mundshëm i biodiversitetit në këtë zonë të mbrojtur.
