Prej dy ditësh, fshati Bulçar në Njësinë Administrative Kodovjat, Bashkia Gramsh, është përfshirë nga një zjarr masiv, ndër më të mëdhenjtë për muajin shtator në qarkun Elbasan. Flakët kanë përfshirë një sipërfaqe të madhe pyjore, duke sjellë në kujtesë situatën dramatike të gushtit, kur qindra hektarë u dogjën dhe pasojat ishin të rënda.
Zjarri nisi në orët e para të së shtunës dhe, ndonëse një pjesë është izoluar, situata vazhdon të jetë alarmante. Era e fortë dhe terreni i thyer malor po pengojnë ndërhyrjen nga toka, ndërsa në operacion janë përfshirë edhe helikopterë për të parandaluar përhapjen drejt zonave të banuara dhe me rëndësi ekonomike.
Sipas Ilir Llapushit, shef i Shërbimit të Zjarrfikëses në Gramsh, forcat zjarrfikëse, punonjës të bashkisë dhe vullnetarë kanë punuar pa ndërprerje, por kushtet atmosferike dhe vështirësia e terrenit po e bëjnë shuarjen të vështirë. Ai theksoi se zjarri po përhapet shpejt për shkak të erës dhe temperaturave të larta.
Ngjarja vjen vetëm pak javë pas zjarreve katastrofike të gushtit, ku mbi 620 hektarë pyje e kullota u dogjën në Bashkinë e Gramshit, së bashku me qindra pemë frutore, stane, bagëti dhe objekte bujqësore. Disa familje u evakuuan, dhe shumë nga dëmet mbeten ende të pakompensuara.
Autoritetet vendore kanë bërë thirrje urgjente për ndërhyrje nga qeveria qendrore dhe për hartimin e një strategjie kombëtare kundër zjarreve, duke përfshirë rritjen e kapaciteteve zjarrfikëse në zonat malore, investime në logjistikë, edukim publik dhe ndëshkime më të forta për zjarrvëniet. Rasti i Bulçarit është një tjetër alarm që kërkon veprim të menjëhershëm, për të shmangur përsëritjen e tragjedive të ngjashme.
