Një situatë shqetësuese është shënuar pasditen e sotme në Malësi të Madhe, ku disa vatra zjarri shpërthyen brenda pak minutash në zonat e Rrëzës, Veshtit, Delajt dhe në fshatin Jeran, njësia administrative Kastrat.
Sipas burimeve nga terreni, gjatë përpjekjeve për të vënë flakët nën kontroll, një mjet zjarrfikës është përfshirë nga zjarri dhe është djegur plotësisht. Pavarësisht kushteve të vështira, të ndikuara nga era e fortë dhe temperaturat e larta, zjarrfikësit arritën të lokalizojnë dhe të izolojnë vatrat.
Në operacionin e ndërhyrjes u angazhuan disa mjete dhe forca zjarrfikëse, me përqendrimin më të madh në fshatin Jeran, ku flakët kërcënuan si sipërfaqe të mëdha me bimësi, ashtu edhe banesat përreth.
Aktualisht, zjarri është shuar dhe situata është nën kontroll.
