Një situatë alarmante është shënuar këtë pasdite në zonën e Gramshit, ku fshati Harunas është përfshirë nga zjarre të fuqishme. Përhapja e shpejtë e flakëve ka bërë thuajse të pamundur ndërhyrjen nga shërbimet zjarrfikëse, pasi edhe rruga kryesore që lidh fshatin me zonat përreth është bllokuar nga zjarri.
Sipas informacioneve paraprake, gjashtë persona janë plagosur dhe janë dërguar me urgjencë në spital. Ata kanë pësuar dëmtime kryesisht si pasojë e ekspozimit ndaj flakëve dhe tymit të dendur.
Ekipet e emergjencës ndodhen në terren, por përmasat e zjarrit dhe vështirësitë në qasjen në zonë po e bëjnë të vështirë kontrollin e situatës. Autoritetet lokale i bëjnë thirrje banorëve të evakuohen në mënyrë të sigurt dhe kërkojnë mbështetje shtesë për përballimin e emergjencës.
