Zjarret që kanë përfshirë ditët e fundit disa bashki të jugut dhe qendrës së vendit kanë shkaktuar dëme të mëdha në sektorin blegtoral dhe bletari, ndërsa Autoriteti Kombëtar i Veterinarisë dhe Mbrojtjes së Bimëve (AKVMB) ka nisur monitorimin intensiv të situatës në terren.
Grupet e punës të AKVMB janë vendosur në zonat më të prekura, ku kanë nisur evidentimin e dëmeve dhe ofrimin e ndihmës së parë për fermerët.
Situata sipas zonave
Fshatrat Tremul dhe Aliko (Njësia Administrative Aliko, Bashkia Finiq): Janë raportuar dëme në kullota dhe parcela me ullinj, por fatmirësisht pa humbje në bagëti. Fermerët janë këshilluar për masat mbrojtëse në rast rreziku.
Njësia Administrative Dhivër (Finiq): Zjarret kanë dëmtuar kullotat dhe ullishtet, duke rrezikuar furnizimin me ushqim për bagëtitë. Fermat janë evakuuar në zona të sigurta.
Fshati Sirakat (Njësia Mesopotam): Është djegur një stallë, ku kanë ngordhur 4 viça. Po ashtu, janë djegur dy parqe bletësh me gjithsej 197 zgjoje (140 + 57).
Bashkia Delvinë: Situata konsiderohet e rënduar. Paraprakisht dyshohet për djegien e një ferme me 25 krerë të imtash, si dhe 9 parqe bletësh me mbi 500 koshere. Monitorimi vijon.
Fshatrat Skëndërbegas, Arunas, Shëmbërdhenjë, Bletës dhe Kullollas: Janë raportuar 9 krerë gjedh, 95 krerë të imtash dhe 50 zgjoje bletësh të djegura. Grupet janë në terren për evidentim të mëtejshëm dhe groposjen e kafshëve të ngordhura sipas protokolleve veterinare. Deri më tani janë groposur 39 krerë gjedh dhe të imta.
