Një natë e gjatë dhe sfiduese është shënuar në zonën e Finiqit, ku disa vatra zjarri, të favorizuara nga era e fortë, kanë përfshirë fshatrat Velahovë, Livinë, Ardhasovë, Bistricë dhe Krongj.
Në terren kanë ndërhyrë ekipet zjarrfikëse të bashkive Finiq, Delvinë, Konispol dhe Sarandë, të mbështetura nga pesë mjete zjarrfikëse, 70 efektivë të Forcave të Armatosura dhe 20 efektivë të Policisë së Shtetit.
Për shkak të rrezikut, është kryer evakuimi i përkohshëm i banorëve në Livinë dhe Ardhasovë. Janë marrë gjithashtu masa për të ofruar ndihmë mjekësore për personat e moshuar.
Në orët e para të mëngjesit është realizuar një operacion për ndalimin e përhapjes së zjarrit drejt Hidrocentralit të Bistricës, ndërsa në zonë pritet të ndërhyhet edhe nga ajri për shuarjen e plotë të flakëve.
Autoritetet kanë njoftuar se, për arsye sigurie, qarkullimi në aksin rrugor Muzinë–Bistricë do të mbetet i kufizuar deri në përfundim të operacioneve. Forcat në terren po monitorojnë situatën për të parandaluar riaktivizimin e zjarreve për shkak të erës dhe temperaturave të larta.
