Një vatër aktive zjarri është regjistruar mëngjesin e së shtunës në fshatin Vajzë, në bashkinë Selenicë të qarkut Vlorë. Flakët, që ndodhen në afërsi të banesave, paraqesin rrezik të vazhdueshëm për banorët e zonës.
Përhapja e zjarrit po ndikohet edhe nga kushtet atmosferike të favorshme për zjarrin, ndërkohë që ndërhyrja për shuarjen e tij është vështirësuar për shkak të mungesës së mjeteve të nevojshme – Bashkia Selenicë disponon vetëm dy zjarrfikëse.
Si pasojë, është kërkuar ndihmë nga shërbimi zjarrfikës i Vlorës për të vënë situatën nën kontroll. Dyshohet se zjarri është vënë qëllimisht, ndërsa hetimet për zbardhjen e plotë të ngjarjes vijojnë.
