Imer Shpata, i dyshuar për zhdukjen pa gjurmë të bashkëshortes së tij, Nadire Shpata, më 22 korrik 2025, do të gjykohet nga Gjykata e Kukësit vetëm për akuzën e armëmbajtjes pa leje.
Prokuroria ka përfunduar hetimet dhe ka ngritur ndaj Shpatës akuzën e armëmbajtjes pa leje, pasi gjatë kontrollit në banesë, pas zhdukjes së bashkëshortes së tij, u gjetën dy automatikë të mbajtur pa leje.
Imer Shpata pritet të dënohet me masën mjekësore të shtrimit të detyruar në një spital psikiatrik, pasi ekspertët kanë vlerësuar se ai është “i papërgjegjshëm mendërisht”. Nga ana tjetër, Prokuroria ka veçuar çështjen dhe po vijon hetimet për akuzën e vrasjes në dëm të Nadire Shpatës.
Nëna e tre fëmijëve, 48 vjeçe, u zhduk pa gjurmë nga banesa në fshatin Bujan të Tropojës, ku jetonte vetëm me bashkëshortin e saj, Imer Shpata. Dyshimet për zhdukjen ranë mbi 48-vjeçarin, i cili më herët ishte dënuar për dhunë në familje. Pavarësisht kërkimeve intensive në Tropojë, Kukës dhe Durrës, nuk është gjetur asnjë gjurmë e saj.
