Të tjera detaje janë zbuluar nga zhdukja e Miklovan Dakajt në Spanjë. Autoritetet spanjolle kanë mundur të identifikojnë dy personat me të cilët ai ka pasur kontakt përpara se të zhdukej pa gjurmë që në 12 maj 2025.
Njëri prej tyre mësohet se është Juxhin Drazhi, i dyshuar si pjesë e grupit kriminal Troplini, drejtuar nga Elvis Doci, i njohur si Visi i Pojës që trafikoi sasi të mëdha kokaine nga Amerika Latine drejt vendeve të BE-së. Drazhi u arrestua në një shtëpi luksoze në Almuñécar (Granada) nga oficerët e Gardës Civile të Malagas. Mediat spanjolle raportuan se policia ra në gjurmët e të shumëkërkuarit pasi konstatoi se në një shtëpi të izoluar në zonë po merreshin masa të shumta sigurie, çka ngriti dyshime të forta për ta.Megjithatë, policia spanjolle kishte ndërkohë një denoncim për zhdukjen e Dakajt dhe ndër të tjera dyshonte për implikimin e Drazhit ndaj me gjasë në bazën ku ai strehohej mund të ketë mbërritur edhe për shkak të hetimit të rastit të Dakajt. Drazhi u arrestua bashkë me një person tjetër dhe nuk dihet nëse në shtëpinë ku ata fshiheshin, të jenë gjetur gjurmë të Dakajt.
Babai i një fëmije të mitur, Miklovan Dakaj u zhduk pa gjurmë më 12 maj pasi drekoi me të shoqen. Sipas policisë spanjolle ai u ngjit në një makinë i pashqetësuar dhe rezulton se një prej personave të fundit që mund të ketë informacion për fatin e tij është Drazhi. Nuk dihet nëse 34-vjeçari ka dhënë dëshmi për autoritetet spanjolle lidhur me këtë ngjarje.34-vjeçari Juxhin Drazhi zotëron kompaninë “Majestic Construction” e cila është vënë nën sekuestro nga SPAK bashkë me 9 prona të tjera të tij.
