Gazetarja Klodiana Lala, e ftuar në emisionin “Të Paekspozuarit” në MCN TV, ka folur gjerësisht mbi procesin e zgjedhjes së kreut të ri të SPAK, duke komentuar emrat e kandidatëve më të përfolur dhe mesazhet e mundshme të partnerëve ndërkombëtarë. Lala theksoi se procedura ligjore detyron Këshillin e Lartë të Prokurorisë (KLP) që tre muaj para përfundimit të mandatit të Altin Dumanit, të hapë garën për drejtuesin e ri të SPAK. Mandati trevjeçar i Dumanit mbyllet më 18 dhjetor 2025. Sipas saj, KLP ka hapur zyrtarisht garën, duke ftuar prokurorët e interesuar të paraqesin kandidaturat e tyre, të shoqëruara me platformën, rezultatet e hetimeve, performancën, si dhe dokumentacionin mbi kontrollin e pasurisë.
"Ligji parashikon dy javë afat, por KLP e ka zgjatur në tre javë. Deri më 8 tetor, kandidatët mund të shprehin interesin dhe të dorëzojnë platformën e tyre. Gjatë gjithë kohës, prokurorët dhe familjarët e tyre janë në kontroll, përgjim dhe vëzhgim. Më pas vjen faza e komunikimit me median dhe procedurat e tjera,” – u shpreh gazetarja.
Lala ndaloi veçanërisht tek takimi i përfaqësueses së SHBA-ve me Altin Dumanin dhe Klodian Brahon, duke e interpretuar këtë si një sinjal mbështetjeje për prokurorin Braho. “Përfaqësuesja e SHBA ka takuar Dumanin dhe Klodian Brahon. Shprehja e kësaj mbështetjeje më bën të mendoj se zoti Braho mund të jetë një nga kandidatët potencialë. Ai ka hetuar çështje të rëndësishme si dosja Toyota Yaris, arrestimi i kryeprokurorit të Vlorës, hetimet për dosjen 5D. Ka qenë nën presion, por në rastet që ka pasur, ka treguar se mund të drejtojë SPAK-un,” tha Lala.
Ndër emrat e tjerë të përmendur nga gazetarja ishin:
Adnan Xholi, i cili ka hetuar çështje të krimit të organizuar, përfshirë atentatin ndaj ish-prokurorit të Durrësit Arjan Ndoji, si dhe laboratorin e drogës në Frakull. Sipas Lalës, familja e tij është aktualisht nën mbrojtje dhe ai konsiderohet kandidat i fortë.
Sotir Kllapi, i cili ka në dorë dosjen “Meta”.
Vladimir Mara, gjithashtu i përfolur si kandidat potencial.
Doloreza Musabelliu, që ka mbajtur barrën e dosjeve ndaj dy prej organizatave më të mëdha kriminale.
“Unë personalisht do të preferoja një person që ka përballuar më shumë presion publik. Në SPAK kemi prokurorë që kanë mbajtur dosje shumë të rënda. Amerikanët ishin sot në SPAK dhe qëndrimi i tyre aty është mesazh i qartë se po monitorojnë procesin. Nuk shkon VanHorn aty me kokën e vet,” përfundoi Lala.
Kandidaturat për kreun e ri të SPAK pritet të bëhen publike pas përfundimit të afatit më 8 tetor, ndërsa procesi i zgjedhjes do të mbetet nën vëzhgim të ngushtë nga partnerët ndërkombëtarë, në veçanti Shtetet e Bashkuara të Amerikës.
