Policia e Tiranës ka zhvilluar operacionin e koduar “Picalla”, gjatë të cilit është zbuluar një bazë e dyshuar armatimi që dyshohet se shërbente për furnizimin e grupeve kriminale.
Gjatë kontrollit në një banesë në fshatin Picallë, janë sekuestruar 9 armë zjarri (5 automatikë, 1 pushkë dhe 3 pistoleta), një armë gjahu, një silenciator, municione luftarake, si dhe uniforma dhe pajisje të ngjashme me ato të Policisë.
Në total, janë gjetur rreth 900 fishekë, si dhe materiale shpërthyese, përfshirë fitila zjarrpërcjellës dhe kapsolla detonatore.
Në lidhje me rastin, është arrestuar në flagrancë shtetasja Mejte Hoxha, 66 vjeçe, ndërsa është shpallur në kërkim shtetasi Oltjan Qershori, 41 vjeç, i dyshuar si posedues i bazës.
Sipas të dhënave zyrtare, ambienti dyshohet se përdorej për furnizimin e grupeve kriminale me armë dhe municione. Materialet e sekuestruara do t’i nënshtrohen ekspertimit në Institutin e Policisë Shkencore për të verifikuar nëse janë përdorur në ngjarje të tjera kriminale.
Hetimet janë në vijim për kapjen e personit të shpallur në kërkim dhe për sqarimin e plotë të rrethanave të çështjes.
