Është zbardhur vrasja me lëndë eksplozive e shtetasit Hysni Ymeri, e ndodhur më 29 dhjetor 2025 në lagjen “Manush Alimani” në Shkodër. Për këtë ngjarje të rëndë janë arrestuar katër persona, të dyshuar si autorë të saj.
Në pranga kanë rënë:
Gerti Bushati, 27 vjeç
Ergys Ibrahimi, 27 vjeç
Edison Hasaj, 25 vjeç
Gjergji Zefi, 24 vjeç
Sipas hetimeve, dyshohet se katër të arrestuarit, kundrejt pagesës dhe në bashkëpunim me njëri-tjetrin, kanë vendosur dhe aktivizuar një sasi lënde eksplozive, e dyshuar me telekomandim në distancë, në panelin elektrik të pallatit ku banonte viktima. Shpërthimi i ka shkaktuar humbjen e jetës Hysni Ymerit.
Ngjarja ndodhi në mbrëmjen e 29 dhjetorit, duke tronditur qytetin e Shkodrës. Të arrestuarit akuzohen se e kanë kryer atentatin me pagesë, ndërsa hetimet vijojnë për zbardhjen e plotë të rrethanave dhe për identifikimin e personave të tjerë të përfshirë.
