Qindra qytetarë në Divjakë, Lushnjë e Fier u mashtruan përmes platformës online “Xuex”, e ndërtuar mbi një skemë tipike piramidale. Hetimet që çuan në pranga 6 persona dhe në shpalljen në kërkim të dy të tjerëve nisën pas një referimi të Drejtorisë për Hetimin e Krimeve Kibernetike pranë Drejtorisë së Përgjithshme të Policisë së Shtetit.
Skema u zbardh falë agjentëve të infiltruar, të cilët dokumentuan mënyrën se si rekrutoheshin qytetarët dhe si kryheshin investimet. Dosja hetimore, e siguruar nga VNA, përfshin jo vetëm metodën e funksionimit të mashtrimit, por edhe dëshmitë e personave të prekur, mes tyre edhe zyrtarë vendorë.
Si funksiononte skema
Verifikimet në terren çuan policinë tek bar-restoranti “La Bonta”, në hyrje të Lushnjës, në rrugën “Shëtitorja e Palmave”, në pronësi të Arbër Çelës. Në vitrinën e xhamit ishin vendosur dy postera që reklamonin platformën “Xuex”: njëri premtonte “Investim një herë = Përfitime të përjetshme”, tjetri fliste për “projekt afatgjatë, punë ekipore dhe shpërblime të shumta”.
Në këtë ambient, policia konstatoi se bëheshin investime në “Xuex”, platformë e dyshuar si mashtrim piramidal. Për këtë arsye, agjentët e infiltruar hynë në lokal dhe kontaktuan me kamarierin Emanuel Taullau, i cili u tregoi se ishte vetë pjesë e skemës. Ai i referoi tek pronari, që njihej me pseudonimin “Profesori”, dhe u sqaroi se shuma minimale për të hyrë në platformë ishte 1000 dollarë.
Një ditë më pas, agjentët u kthyen në lokal dhe Taullau ua prezantoi kolegun e tij, Flavio Mukaj, i cili i regjistroi në grupe të Telegram dhe i udhëzoi për hapjen e llogarive në Binance. Në dosje dokumentohet edhe një transaksion konkret: agjentët i dorëzuan Taullaut 100.000 lekë (më 28.08.2025), që ai i konvertoi në një pagesë prej 1000 dollarësh për llogarinë e tyre në “Xuex”.
Organizatori i dyshuar
Sipas policisë, organizatori i skemës është Ereledio Shebeku. Ai kishte ngritur një grup në Telegram, ku anëtarët investonin nga 1000 deri në 5000 dollarë. Shebeku merrte udhëzime nga një person i identifikuar si “Leo Smith”, i dyshuar si shtetas britanik, i cili udhëzonte pjesëmarrësit që në orare fikse (14:20 dhe 19:20) të bënin “like” në faqe të caktuara. Ky veprim i gjeneronte atyre një përfitim të përditshëm prej 1% mbi shumën e investuar.
Investimet transferoheshin fillimisht në Binance dhe më pas në llogaritë bankare të pjesëmarrësve në Shqipëri, ku kryheshin tërheqjet e rregullta. Vetëm në Divjakë, sipas të dhënave zyrtare, ishin regjistruar rreth 580 persona, përfshirë punonjës të administratës vendore.
Në listën e personave që e shpërndanin më tej skemën rezulton edhe Brunilda Stefan Ndini, e cila, sipas dosjes, kishte rekrutuar familjarë dhe punonjës të tjerë të Bashkisë Divjakë, duke u bërë pjesë e rrjetit të menaxherëve lokalë. Hetimet konfirmojnë se skema zgjerohej përmes rekrutimit zinxhiror, duke shtuar grupe dytësore e tretësore për të rritur fitimet e organizatorëve.
