Zbardhet dëshmia e Kristo Memës, 63-vjeçarit që vrau me thikë 42-vjeçarin Keli Hoxha, pas një debati në Kalanë e Beratit për kalin me të cilin ai shëtiste turistët.
“I thashë të mos e prekte kalin, se kafsha ishte e acaruar. Ai më shau dhe ofendoi. Nxora thikën që e mbaja tek samari i kalit dhe e godita”, iu tha hetuesve, autori i dyshuar i krimit të rëndë, duke pretenduar se vrasjen e kreu në gjaknxehtësi e sipër. Ai tha më tej, se pas ngjarjes, e dërgoi kalin në kasolle dhe pasi mori ushqime u fsheh në “Shpellën e Memecit”, pranë Kishës së Shën Mëhillit ku edhe u arrestua disa orë më vonë nga policia.
Vrasja e Keli Hoxhës ndodhi në sytë e familjarëve të tij, nënës, gruas dhe fëmijëve.
Para policisë, familjarët e viktimës deklaruan se debati mes Kelit dhe 63-vjeçarit nisi pasi ai iu afrua dhe preku kalin. Sipas tyre, Kristo Mema e goditi papritur, në një kohë që i afërmi i tyre po i thoshte se “nuk ka asgjë të keqe”.
Krimi i rëndë ndodhi në lagjen “Kala” të Beratit pasditen e djeshme. Viktima Keli Hoxha, 42 vjeç, ndërrroi jetë rrugës për në spital pasi u godit nga Kristo Mema. Ky i fundit rezulton me precedentë penalë, pasi në 1993 ai kishte kryer një vrasje dhe ishte larguar nga vendi duke ndërruar dhe emrin. Për krimin nuk bëri kurrë burg, pasi vepra u parashkrua.
