Prokuroria e Tiranës ka çuar në gjyq Hekuran Gjonin i akuzuar për vrasjen e djalit të tij Asim Gjoni pas një konflikti banal. Prokuroria shprehet se gjatë hetimeve u zbulua që më 1 shkurt 2025, Hekuran Gjoni është përfshirë në një debat me djalin e tij, ku degradoi duke e goditur me thikë. Për pasojë Asimi humbi jetën nga plaga që kishte marrë në ijën e majtë.
Gjatë marrjes në pyetje, Hekurani ka deklaruar se djali e kishte ngacmuar me fjalë gjatë ngrënies, duke e acaruar. Ai pranoi se e kishte goditur fillimisht me shpullë, por më pas djali e kishte kapur nga rrobat. Në këtë moment, ndërhyri vajza e familjes, e cila u përplas me të birin. Sipas babait, kjo situatë e acaroi aq shumë sa kapën një thikë dhe e goditi djalin një herë në bark.
Ekspertiza mjeko-ligjore konfirmoi se në trupin e Asimit u gjet një plagë prerëse depërtuese në anën e majtë të gjoksit, me dëmtime të mushkërive dhe zemrës, si dhe plagë në gishtat e të dyja duarve. Shkaku i vdekjes është konstatuar si shok traumatik hemorragjik i rëndë.
