Ndoc Maçaj, i cili ekzekutoi mbrëmjen e kaluar Piro Prronin në fshatin Abat të Shalës, ka deklaruar se e kreu krimin pas një konflikti të vazhdueshëm mes tyre. Ai pretendon se prej një muaji, Prroni e akuzonte për vjedhjen e portofolit të tij – një vjedhje që Maçaj thotë se nuk e kishte kryer.
"I bëra be në kishë që nuk e kisha vjedhur unë," ka deklaruar ai përpara hetuesve.
Pavarësisht kësaj, përplasjet mes tyre kanë vijuar, pasi qëndronin shpesh në shoqërinë e njëri-tjetrit. Sipas dëshmisë së autorit të dyshuar, mbrëmjen e ngjarjes, Prroni e kishte fyer, dhe si reagim ndaj kësaj, ai ka hapur zjarr ndaj tij.
Pas disa orësh në arrati, Maçaj është vetëdorëzuar në polici.
Familjet e të dyve kanë konfirmuar se viktima dhe autori frekuentonin shpesh njëri-tjetrin dhe konsumonin alkool së bashku, duke pasur herë pas here edhe konflikte. Megjithatë, policia nuk përjashton pistat e tjera të hetimit, përfshirë edhe atë të përplasjes për pronat.
Piro Prronit iu dha sot lamtumira e fundit, ndërsa Ndoc Maçaj pritet të dalë para Gjykatës së Shkodrës për masën e sigurisë.
