Pandi Nakoleci, 40-vjeçari shqiptar që vrau gruan e tij Marjola Nakoleci, 36 vjeçe, para syve të fëmijëve të tyre në qytetin grek të Volosit, u paraqit të dielën para gjykatës. Gjatë mbërritjes, ai nuk iu përgjigj pyetjeve të gazetarëve që e pyesnin: “Pse e bëre?” dhe nëse kishte ndonjë pendesë për veprimin e tij, duke qëndruar në heshtje me kokën ulur.
Sipas mediave greke, brenda ambienteve të gjykatës ai takoi vajzën e tij 18-vjeçare, të cilës i tha: “Isha i hutuar, nuk doja ta bëja.”
Prokuroria ka ngritur ndaj tij një akuzë penale për vrasje me dashje ndaj një viktime të dhunës në familje. Oficeri hetues i ka dhënë atij një afat për të paraqitur kërkesën për falje ditën e martë në orën 10:00.
Ndërkohë, zyra e prokurorit ka urdhëruar nisjen e një hetimi social për fëmijët e mitur të çiftit, për të përcaktuar kujdestarinë dhe vendbanimin e tyre të mëtejshëm. Aktualisht, fëmijët po qëndrojnë pranë të afërmve të nënës së ndjerë.
Pas krimit, Nakoleci qëndroi në arrati për më shumë se 24 orë, duke u përpjekur t’i shpëtonte ndjekjes së policisë. Ai u kap i fshehur në një zonë të mbuluar me bar, rreth 200 metra larg shtëpisë së tij, në një parking të braktisur.
Sipas dëshmive të fqinjëve dhe kalimtarëve, gjatë momentit të arrestimit ai shfaqi agresivitet dhe u tha efektivëve se gruaja e kishte tradhtuar. “Ia bëra mirë. Ajo e meritonte këtë. Nuk pendohem për asgjë”, dyshohet të kenë qenë fjalët e para të tij pas arrestimit.
