Detaje të reja kanë dalë në dritë për ngjarjen e rëndë të ndodhur pasditen e së martës në zonën e Komunës së Parisit, ku një 36-vjeçar humbi jetën pas një konflikti me kolegun e tij në ambientet e lokalit ku punonin të dy.
Sipas njoftimit zyrtar të Policisë së Shtetit, pas veprimeve hetimore, shërbimet e Komisariatit Nr. 2 në bashkëpunim me Forcën e Posaçme “Shqiponja” kanë gjetur dhe sekuestruar thikën me të cilën dyshohet se është kryer vrasja.
Autori i dyshuar, Filip Shehu, 41 vjeç, u arrestua në flagrancë menjëherë pas ngjarjes. Nga verifikimet e kryera, ka rezultuar se ai është i dënuar më parë për veprën penale “Prodhimi, mbajtja, blerja apo shitja pa leje e armëve të ftohta”.
Viktimë e këtij konflikti mbeti 36-vjeçari Indrit Ismaillari, i cili nuk arriti t’i mbijetonte plagëve të marra. Policia po vijon hetimet për zbardhjen e plotë të rrethanave të ngjarjes.
