Shtetasi shqiptar Altin Sinomati, i konsideruar nga autoritetet italiane si nxitësi i vrasjes së Selavdi Shehaj (i njohur si Passerotto), u arrestua në Abu Dhabi nga policia e Emirateve të Bashkuara Arabe.
Arrestimi u krye në bazë të një Njoftimi të Kuq ndërkombëtar të lëshuar nga Drejtoria Anti-Mafia e Distriktit të Romës, pas një kërkimi disa vjeçar. Sinomati akuzohet se ka dhënë urdhrin për ekzekutimin e Shehajt, të vrarë më 20 shtator 2020 në plazhin e Torvaianica-s, afër Romës, duke i dorëzuar autorit të krimit, Raul Esteban Calderon, shumën prej 150 mijë eurosh.
Për këtë vrasje, Calderon dhe bashkëpunëtori i tij Giuseppe Molisso janë dënuar me burgim të përjetshëm nga Gjykata e Krimeve të Rënda e Frosinone-s.
Sinomati akuzohet gjithashtu se ka qenë pjesë e një rrjeti të fuqishëm trafiku kokaine në Romë, të drejtuar nga Molisso dhe Leandro Bennato, organizatë e shpërbërë nga Karabinierët në mars të vitit 2025. Ai kishte arritur t’i shpëtonte arrestimit, pasi dyshohej se ishte vënë në dijeni të hetimit dhe ishte larguar drejt Emirateve.
Sipas “Corriere della Sera”, një nga bashkëpunëtorët e tij, Giuseppe Molisso, ndodhet sërish në qendër të vëmendjes së hetimeve pas sulmit ndaj gazetarit italian Sigfrido Ranucci, drejtuesit të emisionit “Report”, ngjarje e ndodhur pak ditë më parë në zonën e Campo Ascolano, pranë Torvaianicës.
