Shtetasi rumun, Daniel Cornea 53-vjeçar me precedentë të theksuar kriminalë është shpallur në kërkim nga Policia e Vlorës, pasi dyshohet se ka vepruar si ekzekutor në vrasjen e Renato Hoxhaj në Vlorë. Roja e një pallati u ekzekutua në derën e shtëpisë së tij, dhe dyshohet se vrasja u urdhërua nga Dubai, pasi ai kishte vepruar për llogari të grupeve kriminale duke dhënë informacion.
“Si rezultat i angazhimit profesional të strukturave hetimore dhe operacionale, ditët e fundit, në Vlorë, është bërë e mundur zbardhja dhe dokumentimi me prova ligjore i vrasjes së shtetasit Renato Hoxha, ndodhur më datë 27.04.2025”, deklaroi drejtori i Policisë së Vlorës, Elidon Cela.
Tre ditë më parë, sipas policisë u arrestua Kleanth Bylyku alias Armando Gega, 42 vjeç, banues në Vlorë.
“Ndaj tij ishte lëshuar urdhër ekzekutimi i vendimit penal nga Gjykata e Vlorës, për caktimin e masës së sigurisë “Arrest në burg”, për vrasjen e shtetasit Renato Hoxhaj, ndodhur më 27.04.2025, rreth orës 06:20, në lagjen ‘Hajro Çakërri’, pranë Poliklinikës së qytetit të Vlorës. Viktima u qëllua me armë zjarri, me katër plumba në trup dhe kokë, duke humbur jetën në vend”, theksoi policia.
Më tej kryepolici i Vlorës deklaroi se “U shpall në kërkim shtetasi i huaj, me kombësi rumune, D. C., 53 vjeç, me precedent të theksuar kriminal në fushën e krimeve kundër personit. Për këtë shtetas është lëshuar urdhër arresti ndërkombëtar për veprat penale ‘Vrasja me paramendim’, e kryer në bashkëpunim dhe ‘Prodhimi dhe mbajtja pa leje e armëve, armëve shpërthyese dhe municionit’”.
Më herët, në prill u ndalua nga policia shtetasi Eris Mehmetaj, djali i një ish-deputeti të PD-së, i cili akuzohet për veprën penale “Sigurimi i kushteve dhe i mjeteve materiale për të kryer vrasje”. Mehmetaj, sipas policisë, siguroi makinën që u përdor në vrasje.
Në hetim për këtë vrasje është edhe një shtetas tjetër, me inicialet I. S., 26 vjeç, i arrestuar më parë për veprën penale “Prodhimi dhe shitja e narkotikëve”, për të cilën vijon puna për të përcaktuar rolin e tij.
