Gjykata e Elbasanit cakton masën e sigurisë "arrest me burg” për Nevzat Spahon, i dyshuar për përfshirje në vrasjen e biznesmenit Mondi Mëhalla alias Emond Hyka. Prokuroria tha se ka prova për implikimjn e tij në krim ndërsa i dyshuari kundërshtoi cdo gjetje të Prokurorisë.
Një ditë më parë gjykata la në burg Xhino Agon, i akuzuar si bashkëpunëtor në vrasjen e Mëhallës Kujtim Pishën, roje i karburantit, i akuzuar për moskallëzim të krimit.
Ndërkohë, në kërkim vijojnë të jenë Marselo Arani, 32 vjeç, nga Elbasani, dhe Armando Kola, 35 vjeç, nga Laçi, të dy të dyshuar si autorë të drejtpërdrejtë të ngjarjes. Arani ishte aktualisht nën masën “arrest në shtëpi” për një tjetër çështje penale, ndërsa më herët është arrestuar edhe për pastrim parash, me sekuestrim pasurie prej 136 mijë eurosh.
Nga hetimet ka rezultuar se automjeti i përdorur nga autorët është në pronësi të Xhino Agos, i cili dyshohet ta ketë dhënë me hua për Marselo Aranin.
Pista kryesore e hetimit lidhet me prishjen e pazareve mes dy ortakëve. Grupi i posaçëm hetimor, nën drejtimin e Prokurorisë së Elbasanit, po vijon veprimet intensive për identifikimin dhe kapjen e personave të tjerë të përfshirë në ngjarje.
