Një nga vajzat e Marjola Nakolecit, 36-vjeçares shqiptare të vrarë nga bashkëshorti i saj në Volos të Greqisë, ka rrëfyer momentet dramatike të ngjarjes për mediat greke. Ajo ishte e pranishme në shtëpi kur ndodhi vrasja dhe shprehet se shkak i konfliktit ishte xhelozia e babait.
“Ata u grindën sepse babai im ishte shumë xheloz”, thotë vajza, duke shtuar se mëngjesin e ngjarjes tragjike, Marjola i kishte kërkuar burrit divorcin. “Ai e kapi nga flokët dhe e hodhi përtokë”, tregon ajo.
E mitura rrëfen se situata kishte nisur të përkeqësohej kohët e fundit, megjithëse babai nuk ishte i dhunshëm më parë.
“Ne ishim mirë... Ai nuk bërtiste, nuk pinte. Thjesht xhelozia. Kjo është arsyeja pse e bëri”, thekson ajo.
Dëshmia e vajzës vijon me përshkrimin tronditës të momentit të sulmit:
“Nëna ime po bërtiste ‘ndihmë, ndihmë’. Dhe ai e bëri shpejt dhe iku. E pashë të gjithën. Dhe kur ai e goditi me thikë dhe kur ajo po bërtiste dhe kur e tërhoqi nga flokët, e hodhi përtokë dhe gjithçka.”
“Ajo ishte në dhomë, ata po bërtisnin. Nuk i kushtova shumë vëmendje, po flija. Pastaj mami filloi të thoshte ‘do të më vrasësh’ dhe ai i tha ‘fute të voglin brenda’... Ishim unë dhe vëllai im, ai është 13 vjeç. Nuk di çfarë të them, ishte e papritur.”
Sipas saj, nëna kishte kërkuar ndarjen pak ditë më parë, dhe autori ishte larguar për pak kohë nga shtëpia.
“Ai iku për dy ditë. Pastaj u kthye dhe na thoshte ‘më vjen keq’... Por ne e besuam. Nuk dua ta shoh më para meje…”, përfundon vajza.
