Prokuroria e Tiranës ka përfunduar hetimet dhe ka dërguar për gjykim shtetasin libanez Fadi Alwan, i akuzuar për vrasjen e vajzës së tij, 24-vjeçares Rayyan Alwan. Ai do të përballet me akuzën e “vrasjes në rrethana cilësuese”, vepër penale që parashikon dënim me burgim të përjetshëm.
49-vjeçari u arrestua në Liban më 23 prill 2025, ndërsa autoritetet shqiptare kishin caktuar ndaj tij masën e sigurisë “arrest me burg” në mungesë. Ministria për Evropën dhe Punët e Jashtme ka bërë të ditur se autoritetet libaneze kanë refuzuar ekstradimin e tij drejt Shqipërisë.
Sipas hetimeve, babë e bijë kishin ardhur nga Gjermania në Tiranë në muajin shkurt 2025. Ngjarja e rëndë dyshohet se ka ndodhur në banesën e marrë me qira prej tyre, ndërsa trupi i pajetë i 24-vjeçares u zbulua disa ditë më vonë nga pronarja e apartamentit. Ndërkohë, autori i dyshuar ishte larguar drejt Libanit menjëherë pas krimit.
Motivet e kësaj ngjarjeje mbeten ende të paqarta. Viktima, nënë e tre fëmijëve dhe e divorcuar, kishte nisur një jetë të re në Gjermani. Sipas burimeve hetimore, afrimi i saj me stilin e jetesës perëndimore dyshohet se kishte sjellë konflikte të vazhdueshme me familjen. Për këto probleme, ajo kishte bërë edhe kallëzim pranë autoriteteve në Gjermani.
Hetuesit po vijojnë verifikimet edhe për mundësinë e përfshirjes së personave të tjerë në krim, përfshirë nënën e viktimës, ndonëse deri më tani mungojnë prova të mjaftueshme për të mbështetur këtë pistë.
Trupi i pajetë i 24-vjeçares qëndroi për disa muaj në morgun e Tiranës dhe u tërhoq vetëm pak ditë më parë nga një përfaqësues ligjor i ardhur nga Libani. Më pas, ajo u përcoll për në banesën e fundit në Gjermani nga dy vëllezërit e saj, ku edhe është varrosur.
