Zbardhet dinamika e vrasjes së 14-vjecarit Erald Xhejo nga një bashkëmoshatar në ambjentet e jashtme të një lokali në fshatin Pirg. Policia arrestoi 8 persona, përshirë babain dhe xhaxhain e autorët të dyshuar të ngjarjes, 4 të mitur dhe 34-vjeçari Flori Çela, të cilët tentuan të fshihnin provat e krimit.
Nga hetimet paraprake ka rezultuar se Erald Xhejo dhe 14-vjecari E. Guri autor i ngjarjes përplaseshin prej një viti për motive banale.
Autori i dyshuar jetonte në fshatin Leminot, ndërsa viktima në fshatin Pirg.
Përplasjet kanë vazhduar deri ditën e djeshme, kur ata janë takuar rastësisht në fshatin Pirg dhe konfliktin mes tyre e kanë nisur me fjalët, përse je në fshatin tim, përse me shikon. të pranishëm kanë qenë dhe miqtë e dy të miturve.
Gjatë debatit, janë përleshur dhe autori i dyshuar e ka goditur me thikë. Ndërsa viktima ka patur vetëm një dorezë. Pasi ka kryer krimin, autori ka tentuar të largohet me makinën e 34-vjeçarit Flori Çela.
Policia ka zbuluar më pas se Edison Guri, babai i 14-vjecarit e ka larguar të birin nga vendngjarja, duke tentuar që ti shmanget policisë, ndërsa xhaxhai i tij Roland Guri ka marrë thikën, e ka larë dhe futur në xhep, me qëllim zhdukjen e provave.
Autori i dyshuar njihej si person problematik që shpesh braktiste orët e mësimit në shkollë, ndërsa në rrjetet sociale pozonte me armë zjarri dhe shkruante mesazhe: “shfaqem kur sta pret mendja”.
Njoftimi i policisë
“Në vijim të veprimeve hetimore dhe policore të kryera nga specialistët për Hetimin e Krimeve të Rënda të DVP-Korçë, në bashkëpunim me shërbimet e Komisariatit të Policisë Maliq dhe në drejtimin e Prokurorisë së Korçës, në lidhje me ngjarjen e djeshme, në fshatin Pirg, ku u vra me mjet prerës (thikë), një 14-vjeçar, dyshohet nga një bashkëmoshatar i tij, gjatë një konflikti për motive të dobëta, u vunë në pranga:
-shtetasi E. G., 14 vjeç, banues në fshatin Leminot, për veprat penale “Vrasja me dashje” dhe “Drejtimi i automjetit në mënyrë të parregullt”. 14-vjeçari u dëmtua lehtë, gjatë konfliktit. Ai mori asistencën e nevojshme mjekësore dhe la ambientet e spitalit, ditën e djeshme;
-shtetasit E. G., 44 vjeç dhe R. G., 44 vjeç, përkatësisht babai dhe xhaxhai i 14-vjeçarit, për veprën penale “Veprime që pengojnë zbulimin e të vërtetës”;
-4 të mitur, banues në fshatin Zvirinë, për veprat penale “Moskallëzimi i krimit” dhe “Veprime që pengojnë zbulimin e të vërtetës”;
-shtetasi F. Ç., 34 vjeç, banues në fshatin Leminot, për veprën penale “Moskallëzimi i krimit”.
