Gjykata e Shkallës së Parë Vlorë ka vendosur sot masën e sigurisë “arrest në burg” për Orest Çorapaj dhe Julian Zogaj, ndërsa Vilson Agaj është lënë në arrest shtëpie. Tre të rinjtë u arrestuan më 12 dhjetor, të dyshuar si autorë të pengmarrjes së 39-vjeçarit Fisnik Xhaka, shtetas nga Kosova. Sipas Policisë, ngjarja lidhet me një borxh të pashlyer, ndërsa Xhaka dyshohet se është mbajtur peng për rreth dy javë në një banesë në lagjen “Osman Haxhiu” në qytetin e Vlorës. Për lirimin e tij, autorët dyshohet se i kishin kërkuar 70 mijë euro.
Nga ana e mbrojtjes, avokatët kanë deklaruar se 39-vjeçari kishte shkuar vetë në Vlorë për të qëndruar për një periudhë kohe dhe se raportimi i pengmarrjes është bërë nga motra e tij, e cila jeton në Suedi. Ata shtojnë se kërkesa për para lidhet me një borxh dhe se rasti është keqinterpretuar si pengmarrje.
Kontrollet e Policisë Gjyqësore në banesën ku mbahej Xhaka kanë gjetur valixhen me rrobat personale të tij, fakt që sipas mbrojtjes mbështet pretendimin se ai kishte shkuar vullnetarisht. Videot filmike të siguruara tregojnë komunikim të qetë mes personave dhe njohje të mëparshme, megjithëse nuk është e qartë data dhe ora e regjistrimit. Hetimet për zbardhjen e plotë të rrethanave të ngjarjes vijojnë.
