Shirat intensive që kanë përfshirë vendin gjatë ditës së sotme vijojnë të mbajnë në nivele të larta prurjet e lumenjve në qarkun Fier. Ndërsa në Memaliaj raportohet për rënie të nivelit të Vjosës, situata në Urën e Mifolit paraqitet shumë më e rënduar.
Matjet e fundit tregojnë se lumi ka arritur kuotën 8.2 metra, duke shënuar një rritje të konsiderueshme dhe duke rritur rrezikun për përmbytje në zonat e ulëta, tokat bujqësore dhe disa banesa pranë shtratit të lumit. Autoritetet paralajmërojnë se nëse prurjet mbeten në këtë intensitet, situata mund të përkeqësohet më tej.
Ndërkohë, një tjetër vatër rreziku është evidentuar në fshatin Sheqeras, në bashkinë Maliq, ku argjinatura e lumit dytësor që vjen nga Ormani dhe Pojani paraqitet e dëmtuar dhe me mundësi çarje. Kjo ka vënë në alarm autoritetet lokale dhe qarkore.
Grupi i punës po vlerëson situatën dhe po merr masa për forcimin e argjinaturës, me qëllim shmangien e një përmbytjeje të mundshme. Autoritetet u bëjnë thirrje banorëve të qëndrojnë të qetë, por në gatishmëri, si dhe të ndjekin udhëzimet e ekipeve të emergjencave. Përpjekjet po vijojnë për të stabilizuar situatën dhe për të parandaluar dëme të mëdha në banesa dhe në tokat bujqësore përreth.
