Ish-drejtori i Përgjithshëm i Burgjeve, Agim Ismaili, së bashku me dy ish-zyrtarë të tjerë, Arnold Rokaj dhe Zambak Gjoni, pritet të përballen me Gjykatën e Posaçme për akuzën e hakerimit të serverave të SPAK, veprim i kryer në kuadër të një grupi të strukturuar kriminal. Në kërkesën për gjykim thuhet se gjatë hakerimit të kompjuterave të dy prokurorëve, anëtarët e këtij grupi kanë arritur të sigurojnë materiale hetimore dhe të dhëna të ndjeshme që lidhen me figura të rëndësishme të politikës dhe krimit të organizuar.
Sipas të dhënave të dosjes, në duart e anëtarëve të grupit, ku bënte pjesë edhe Ismaili, kanë përfunduar informacione për ish-zëvendëskryeministrin Arben Ahmetaj, ish-ministrin Damian Gjiknuri, biznesmenin Klodian Allajbeu, si dhe kryebashkiakun e Tiranës, Erion Veliaj. Po ashtu, rezulton se janë siguruar të dhëna edhe nga dosja hetimore e kreut të organizatës kriminale “Copja”, Franc Copja.
Hetimet tregojnë se Ismaili dhe dy të pandehurit e tjerë, pasi kishin hakeruar kompjuterat e prokurorëve Enkelejda Millonai, Behar Dibra dhe Doloreza Musabelliu, synonin të shtrinin aktivitetin e tyre edhe te prokurorë të tjerë të SPAK.
VNA ka raportuar që në krye të herës për këtë çështje. Në 3 prill të vitit 2025 u raportua se SPAK kishte nisur hetimet për këtë grup te struktuaruar kriminal.
Megjithatë, pavarësisht se Agim Ismaili ndodhet tashmë nën akuzë, mbetet ende e paqartë arsyeja se përse grupi kishte nevojë për të dhënat kompjuterike të prokurorëve të SPAK dhe për përgjime të paligjshme ndaj personave të ndryshëm. Pyetjet kryesore vazhdojnë të qëndrojnë: cili ishte qëllimi përfundimtar dhe kush fshihet realisht pas Agim Ismailit?
