Në cilësinë e Drejtuesit të Strukturës së Posaçme kundër Korrupsionit dhe Krimit të Organizuar (SPAK), Altin Dumani zhvilloi një vizitë zyrtare në Washington D.C., në Shtetet e Bashkuara të Amerikës, më datat 2 dhe 3 shtator 2025. Gjatë kësaj vizite, Dumani zhvilloi takime të nivelit të lartë me përfaqësues të rëndësishëm të institucioneve amerikane, përfshirë Departamentin e Shtetit, Departamentin e Drejtësisë dhe Byrosë Federale të Hetimit (FBI).
Në qendër të diskutimeve ishte rëndësia e forcimit të bashkëpunimit mes SPAK dhe agjencive ligjzbatuese amerikane, me qëllim goditjen e organizatave kriminale ndërkombëtare, parandalimin e trafikut të paligjshëm të lëndëve narkotike si edhe luftën kundër pastrimit të parave. Dumani vuri theksin tek rëndësia e bashkëpunimit strategjik me Shtetet e Bashkuara dhe shprehu mirënjohjen e tij për mbështetjen e vazhdueshme që i është dhënë SPAK-ut dhe institucioneve shqiptare në këtë drejtim.
???? Pjesëmarrja në Konferencën e DEA-s
Përveç takimeve në Washington, Dumani mori pjesë më herët edhe në Konferencën Ndërkombëtare për Zbatimin e Ligjit për Narkotikët, të organizuar nga Agjencia Amerikane Kundër Narkotikëve (DEA), e cila u zhvillua në Nashville, Tennessee, në datat 26–28 gusht 2025. Konferenca, me temën “Uniteti global për një të ardhme më të sigurt: Forcimi i aleancave kundër krimit transnacional”, u përshëndet nga Prokurorja e Përgjithshme e Shteteve të Bashkuara, Pamela J. Bondi. Në këtë aktivitet, Dumani zhvilloi një takim të posaçëm me administratorin e DEA-s, Terrance Cole, ku u vlerësua bashkëpunimi ekzistues mes Shqipërisë dhe Shteteve të Bashkuara në luftën kundër trafikut ndërkombëtar të narkotikëve. Palët theksuan rëndësinë e vazhdimit dhe zgjerimit të këtij bashkëpunimi në të ardhmen.
Drejtuesi i SPAK pati gjithashtu takime me drejtues të agjencive të rëndësishme të zbatimit të ligjit nga vende të ndryshme pjesëmarrëse në konferencë. Diskutimet u fokusuan tek krijimi i urave të reja të komunikimit dhe forcimi i marrëdhënieve ekzistuese, me synim rritjen e efektivitetit në luftën e përbashkët kundër trafikut ndërkombëtar të narkotikëve dhe krimit të organizuar.
Kjo vizitë dhe pjesëmarrja në aktivitetet ndërkombëtare konfirmojnë edhe një herë rolin e SPAK si një partner i besueshëm në përpjekjet globale për drejtësi dhe siguri.
