Gjatë një takimi me gazetarët këtë të mërkurë, kreu i SPAK, Altin Dumani, komentoi për herë të parë vendimin e fundit të Gjykatës Kushtetuese, si dhe çështjen “Gëllçi” të trajtuar në Gjykatën Europiane për të Drejtat e Njeriut.
I pyetur nëse vendimet e Kushtetueses ndikojnë në punën e SPAK, Dumani tha:
“Ne nuk i diskutojmë vendimet e Kushtetueses. Ne i zbatojmë dhe i respektojmë ato. Do të mirëpresim arsyetimin dhe, në rast se duhet të nxjerrim mësime, do t’i nxjerrim.”
Deklarata e tij vjen pas një vendimi ku Gjykata Kushtetuese, me kërkuese ish-prokuroren Onejda Ymeraj, kufizoi mënyrën se si SPAK mund të sekuestrojë telefonat celularë në procedurat hetimore.
Lidhur me çështjen “Gëllçi” në GjEDNJ, Dumani theksoi se problemi kishte ardhur nga mungesa e koordinimit ndërinstitucional.
“Në rastin Gëllçi ka pasur një mospërputhje mes institucioneve. Avokatura e Shtetit nuk ka kërkuar asnjë informacion nga SPAK gjatë shqyrtimit në Strasburg, duke mos na dhënë mundësi të paraqesim versionin tonë. Ka pasaktësi në vendimin e Gjykatës Europiane – aty thuhet se Gëllçi është vetëdorëzuar, ndërkohë që ai është lokalizuar dhe arrestuar pas vendimit në mungesë. Edhe për afatin e mbylljes së hetimit ka pasaktësi.”
Megjithatë, Dumani nënvizoi se “thelbi i vendimit nuk është cënuar”, duke përfunduar se ka nevojë për “më shumë koordinim mes institucioneve” në raste të ngjashme.
