Gjykata Kushtetuese ka vendosur të rrëzojë kërkesën e Gjon Shkambit, duke lënë në fuqi vendimin e Gjykatës së Lartë dhe burgosjen e tij. Shkambi pretendonte cenim të procesit të rregullt ligjor dhe tejkalim të afateve të arsyeshme të gjykimit, por trupa kushtetuese nuk i gjeti këto pretendime të bazuara.
Kjo çështje mbart një peshë të rëndë publike, pasi Gjon Shkambi është personi që vuri në lëvizje Gjykatën e Apelit për një konflikt prone në Shkodër, i cili kulmoi me vrasjen tronditëse të gjyqtarit Astrit Kalaja brenda sallës së gjyqit.
Ngjarja e rëndë ndodhi më 6 tetor 2025, rreth orës 15:35, në ambientet e Gjykatës së Apelit në Tiranë.
Sipas dinamikës së zbardhur nga policia dhe dëshmitarët, Gjon Shkambi ishte personi që po debatonte ashpër me gjyqtarin Kalaja në momentin e shpalljes së vendimit. Raportohet se ai i është drejtuar magjistratit me fjalët: "Po vërtetoj ato që ka thënë e gjithë Shkodra për ty...", vetëm pak sekonda para krimit.
Në këtë moment, nipi i tij, Elvis Shkambi (30 vjeç), i cili po shoqëronte xhaxhain në seancë, nxori armën tip pistoletë dhe qëlloi tre herë në drejtim të gjyqtarit, duke e lënë të vdekur.
Nga të shtënat mbetën të plagosur edhe palët kundërshtare në proces, babë e bir, Rakip dhe Ervis Kurtaj.
Gjon Shkambi ka tentuar në vazhdimësi të kërkojë lirinë apo lehtësimin e masës së sigurisë, duke pretenduar se nuk ishte në dijeni të planit të nipit të tij. Megjithatë, prokuroria ka ngritur dyshime se ai ka luajtur rol shtytës, duke marrë parasysh faktin që nipi e shoqëronte si "mbështetje" në një seancë ku pritej humbja e gjyqit për pronën e ish-shkollës së Rezervave në Shkodër.
Me vendimin e fundit të Kushtetueses, Shkambi dështon në tentativën e radhës për të rrëzuar vendimet e gjykatave të rregullta, ndërsa procesi ndaj tij dhe nipit të tij vijon.
