Vëllai dhe nipi i ish-deputetit socialist Arben Ndoka janë shpallur në kërkim pasi dyshohet se kanë dhunuar në një lokal Nikollë Markun dhe kushëririn e tij. Nikollë Marku ka deklaruar se dhunuesit kanë qenë pesë persona të maskuar dhe të armatosur, ndërsa njëri prej tyre është prezantuar si nipi i Arben Ndokës. Ish-deputeti Arben Ndoka ndodhet gjithashtu në kërkim nga SPAK për akuza të rënda në kuadër të operacionit “Revanshi”.
Lezhë / Informacion paraprak
Rreth orës 12:30, në ambientet e një lokali në qytetin e Lezhës, shtetasit Gj. M., 41 vjeç dhe N. M., 41 vjeç (kushërinj), dyshohet se janë konfliktuar për motive të dobëta me shtetasit G. N., rreth 53 vjeç dhe K. N., rreth 20 vjeç (babë e bir).
Si pasojë e konfliktit, janë dëmtuar shtetasit Gj. M. dhe N. M., të cilët, pasi kanë marrë ndihmën e nevojshme mjekësore, janë paraqitur në ambientet e Komisariatit të Policisë, ku kanë deklaruar se shtetasit G. N. dhe K. N. kanë qenë të armatosur.
Policia po vijon kërkimet intensive për kapjen e shtetasve G. N. dhe K. N., ndërsa një grup i posaçëm hetimor, nën drejtimin e Prokurorisë së Lezhës, po punon për zbardhjen dhe dokumentimin e plotë të rrethanave të këtij rasti.
