Një seri aksidentesh rrugore të ndodhura në orët e fundit në disa qytete të vendit ka sjellë pasoja të rënda, me viktima dhe të plagosur, duke rikthyer në vëmendje problematikën e sigurisë në rrugë.
Në Tirana, një aksident i rëndë u regjistrua pak minuta më parë në rrugën “Ibrahim Rugova”, pranë zonës së njohur si Libri Universitar. Sipas të dhënave paraprake, një automjet tip “Benz”, me ngjyrë të bardhë, ka hipur mbi trotuar, duke plagosur një kalimtare dhe duke shkaktuar panik te banorët përreth. Në vendngjarje kanë mbërritur forcat e policisë, ndërsa drejtuesi i mjetit është identifikuar dhe po merret në pyetje për rrethanat e ngjarjes.
Po në Tirana, një tjetër aksident me pasojë vdekjen u shënua paraditen e sotme në zonën e Kombinatit. Një 61-vjeçar, me inicialet Y.D., humbi jetën pasi motoçikleta që ai drejtonte u përplas me një kamion. Drejtuesi i kamionit është shoqëruar në komisariat, ndërsa grupi hetimor vijon punën për zbardhjen e plotë të shkaqeve.
Një ditë më parë u raportua aksident edhe në aksin rrugor Kavajë–Rrogozhinë, në afërsi të mbikalimit të Gosës. Një këmbësor ka humbur jetën pasi është përplasur nga një automjet që drejtohej nga një 39-vjeçar. Ky i fundit është shoqëruar nga policia.
Gjithashtu para 4 ditë më parë, një aksident me pasoja fatale është regjistruar në Kukës, në aksin rrugor Bicaj–Kukës. Sipas policisë, një 56-vjeçar ka përplasur një këmbësor 64-vjeçar, i cili ka ndërruar jetë në vendngjarje. Drejtuesi i automjetit është shoqëruar në komisariat.
Gjithashtu në 18 prill një tjetër aksident me pasojë vdekjen është shënuar edhe në aksin Milot–Rrëshen, pranë qytetit të Burrelt. Një këmbësor rreth 70 vjeç ka humbur jetën pasi është përplasur nga një automjet.
Këto aksidente të njëpasnjëshme tregojnë se siguria e qytetarit në rrugë është e brishtë dhe një pasqyrë e një problemi që kërkon zgjidhje prej kohësh. Ndërkohë, institucionet duket se reagojnë më shumë pas tragjedive sesa para tyre, dhe viktimat mos t’i kthejnë vetëm në statistika në deklaratat politike. Siguria shpesh përmendet si arritje, por që në rrugë qytetarët e paguajnë çdo ditë me frikë dhe, në rastet më të rënda, me jetën e tyre.
