Aurel Hoxha, alias Kolaveri, pronar i lokalit "Monopol", i cili dyshohet se urdhëroi vrasjen e Klevis Lleshit në vitin 2020 kundrejt një shume prej 50 mijë eurosh për motive gjakmarrjeje, rezulton të jetë i përfshirë në trafik kokaine nga Amerika Latine drejt vendeve të Bashkimit Evropian, si dhe në një skemë pastrimi parash.
“Nga provat e administruara, rezulton se shtetasi Aurel Hoxha, në rolin e krijuesit, drejtuesit dhe organizatorit, ka krijuar një grup të strukturuar kriminal, me synimin për kryerjen e veprimtarisë së kundërligjshme të pastrimit të produkteve të veprës penale ose veprimtarisë kriminale, ku pjesëtarë të këtij grupi të strukturuar kriminal janë shtetasi Samet Loka dhe shtetas të tjerë të paidentifikuar. Të ardhurat e kundërligjshme dyshohet se janë krijuar nga aktiviteti i kundërligjshëm i trafikimit të narkotikëve nga vendet e Amerikës së Jugut drejt vendeve të Bashkimit Evropian dhe Shqipërisë. Nga ky aktivitet i paligjshëm, dyshohet se janë krijuar të ardhura monetare, të cilat kanë shërbyer për investime në aktivitete tregtare, pasuri të paluajtshme dhe pasuri të luajtshme, këmbimin apo transferimin e pasurive, me qëllim fshehjen ose mbulimin e origjinës së paligjshme të tyre, kryerjen e veprimeve financiare ose transaksioneve të copëzuara për shmangien nga raportimi, sipas legjislacionit për parandalimin e pastrimit të parave”, thuhet në njoftim.
Vrasja e Klevis Lleshit u zbardh pas zbërthimit të aplikacionit të koduar dhe dyshohet se Sabah Nuzi e kreu krimin kundrejt një pagese prej 50 mijë eurosh.
Prokuroria e Posaçme thotë se Aurel Hoxha, pronar i lokalit "Monopol", veproi në shenjë hakmarrjeje për vrasjen e vëllait të tij, Agim Hoxha, në Britaninë e Madhe në vitin 2012. Në familjen Lleshi janë vrarë pesë pjesëtarë, përfshirë edhe Arben Lleshin brenda në burgun e Peqinit, i cili ishte autori i vrasjes së Agim Hoxhës.
