15 banorë të Rrjollit janë vetëdorëzuar këtë të hënë në komisariat, pasi ishin shpallur në kërkim nga Policia e Shkodrës pas protestës së 28 shkurtit.
Deri më tani dy persona janë arrestuar, ndërsa shtatë të tjerë po hetohen në gjendje të lirë. Protesta e zhvilluar të shtunën degradoi në përplasje fizike mes banorëve të Rrjollit dhe punonjësve të një kompanie private sigurie, e kontraktuar nga firma ndërtuese për të garantuar sigurinë e stafit dhe kantierit.
Kompania ka nisur punimet për ndërtimin e një resorti luksoz, por prej rreth një muaji përballet me kundërshti të forta nga banorët e zonës, të cilët kërkojnë largimin e saj nga prona që pretendojnë si të tyren.
Avokati Ndue Pjetra e cilësoi kërkesën për arrestimin e banorëve si një manovër të Policisë së Shkodrës për të frenuar protestat. Sipas tij, përplasja ka ndodhur me punonjësit e policisë private, ku një prej tyre ka mbetur i plagosur.
