Emri i Daniel Shimës, ish-zëvendësdrejtor i Agjencisë Kombëtare të Shoqërisë së Informacionit, ka marrë një tjetër përmasë pas zhvillimeve të fundit. Ai për vite me radhë ka qenë numri dy i AKSHI-t, direkt pas Mirlinda Karçanajt, në një agjenci që menaxhon sistemet e teknologjisë dhe informacionit në të gjitha institucionet shtetërore. Shkarkimi i tij ndodhi në mars të vitit 2024, pikërisht në ditën kur Karçanaj u mor për disa orë në pyetje nga Prokuroria e Posaçme lidhur me tenderat me vlerë 43 miliardë lekë. Ky rast u lexua si një sinjal i fortë se Shima kishte dijeni për proceset e tenderimit dhe për mënyrën si ishin administruar fondet.
Një vit më parë, ai ishte vendosur nën mbrojtjen e Gardës së Republikës, një masë që merret vetëm kur institucionet e sigurisë vlerësojnë një rrezik real për jetën e një zyrtari. Megjithatë, publikisht nuk është dhënë kurrë një shpjegim i qartë pse Daniel Shima duhej të mbrohej dhe kush përbënte kërcënim ndaj tij.
Emri i tij doli në skenë edhe nga denoncimi i bërë muaj më parë nga ish-zv.kryeministri Arben Ahmetaj nga arratia, i cili deklaroi se Shima ishte kërcënuar të heshtte. Por nëse deri dje deklaratat e Ahmetajt përdoreshin kryesisht si referenca politike, sot situata ka marrë një kthesë shumë më të rëndë: familja e Daniel Shimës ka denoncuar zhdukjen e tij në polici.
Kjo e bën rastin edhe më të errët. Një ish-zyrtar i lartë i një agjencie strategjike, që ka mbajtur në dorë aksesin mbi të gjitha sistemet e informacionit të shtetit, i shkarkuar në rrethana të dyshimta, i vënë nën mbrojtje nga Garda dhe më pas i përfolur si i kërcënuar, tashmë rezulton i zhdukur. Çfarë dinte Daniel Shima? A ishte ai në dijeni të plotë për tenderat e shumëpërfolur të AKSHI-t? A u bë shënjestër për atë që mund të dëshmonte?
Denoncimi për humbjen e tij e shpallur nga familja nuk është thjesht një ngjarje personale, por një çështje me pasoja të drejtpërdrejta publike dhe institucionale.
