Gjykata e Posaçme iu komunikoi masën e sigurisë “arrest me burg” Lulzim Pepaj, Florian Markun dhe Anton Kolës, tre të dyshuar si anëtarë të grupit kriminal të drejtuar nga Jetmir Pepaj që është në arrati. Seanca u zhvillua me dyer të mbyllura, për shkak të sekretit hetimor. SPAK goditi grupin kriminal të Pepaj dhe firmosi 11 urdhër-arreste, por vetëm 3 prej tyre u ekzekutuan. Grupi dyshohet se përgjatë 2019-2021 trafikoi 7.5 tonë kokainë nga Ekuadori dhe Peruja drejt Belgjikës dhe Holandës, e fshihnin në lëng frutash të ngrira, konserva peshku apo rrush të thatë. SPAK sekuestroi pasuritë e Pepajt me vlerë 12 milionë euro. Kompania “Pepa Group” ka fituar e vetme 12 tendera publike me vlerë miliona euro.
