Një ngjarje e rëndë ka ndodhur këtë të martë në burgun e Shkodrës, ku është gjetur i varur në qelinë e tij Brendon Ronald Saporito, 57 vjeç, me shtetësi amerikane.
Sipas të dhënave zyrtare, Saporito u gjet ende me shenja jete nga bashkëvuajtësit dhe u dërgua me urgjencë në spitalin e Koplikut, por pavarësisht ndërhyrjes së mjekëve, ai nuk arriti të mbijetojë.
I ndjeri ishte arrestuar më 2 maj 2025 dhe mbahej në paraburgim për akuzën “vrasje për shkak të marrëdhënieve familjare”, me vendim të Gjykatës së Shkodrës.
Ngjarja është njoftuar menjëherë autoriteteve, ndërsa po zhvillohen hetime për të zbardhur rrethanat e plota. Drejtoria e burgut bën me dije se po bashkëpunon me Prokurorinë e Shkodrës dhe Shërbimin e Kontrollit të Brendshëm në Burgje për dokumentimin e ngjarjes.
Njoftim për media
Në IEVP Shkodër, më datë 28 tetor 2025, i paraburgosuri Brendon Ronald Saporito është gjetur i varur në dhomën e tij nga bashkëvuajtësit. Punonjësit e institucionit e kanë nxjerrë me puls dhe me shenja jete drejt urgjencës, ku stafi mjekësor i ka dhënë ndihmën e parë. Pavarësisht ndërhyrjes së menjëhershme nga Spitali i Koplikut dhe përpjekjeve të stafit mjekësor, i paraburgosuri nuk ka arritur të mbijetojë.
Brendon Ronald Saporito, i datëlindjes 22.04.1968, i biri i Joesph Binald Saporita dhe Marichea (Klein) Saporita, ndodhej në IEVP Shkodër për efekt të vendimit të Gjykatës Shkallës Parë Shkodër, e cila i kishte caktuar masën e sigurisë “Arrest në burg”, i dyshuar për veprën penale “Vrasje për shkak të marrëdhënieve familjare”. Ai ishte arrestuar më 02.05.2025 dhe ishte sjellë në institucion më 04.05.2025.
