75 vite mbi supe dhe një betejë që nuk zhvillohet vetëm me sëmundjen. Që prej vitit 2019, një i moshuar nga Tirana jeton me diagnozën “Adenoma e Hipofizës”, një tumor beninj në gjendrën që kontrollon hormonet e trurit. Por prej më shumë se dy vitesh, ankthi i tij nuk lidhet vetëm me shëndetin, por me një pyetje të përditshme: a do ta gjejë dot ilaçin që e mban në jetë?
75-vjeçari tregon se medikamentin “Dostinex”, të cilin duhet ta marrë çdo dy ditë, nuk arrin më ta sigurojë në farmacitë shqiptare. Në shumë raste, ai detyrohet ta gjejë në rrugë informale, përmes kontrabandës, aty ku as cilësia dhe as vazhdimësia nuk garantohen. Ka ditë kur ilaçi mungon krejtësisht dhe pritja kthehet në frikë.
“Pa të nuk jam mirë. Por nuk kam ku ta gjej,” thotë ai, ndërsa shpjegon se çdo tabletë kushton rreth 400 lekë, një barrë e rëndë për një pensionist që lufton çdo ditë me sëmundjen.
Edhe farmacitë në vend pranojnë se prej vitesh nuk furnizohen me këtë medikament. Në heshtje, pacientë si ai mbeten të detyruar të kërkojnë zgjidhje jashtë sistemit, në një treg informal ku shpresa për trajtim varet nga rastësia dhe jo nga kujdesi shëndetësor.
