Një ngjarje e pazakontë dhe tronditëse ka ndodhur të dielën e kaluar në Bruksel, ku trupi i një 29-vjeçari me origjinë shqiptare u gjet i varur në pjesën e pasme të një tabele sinjalizimi në zonën e Anderlechtit, pranë “Westland Shopping”.
Ngjarja u konfirmua nga prokuroria e Prokurorit Mbretëror të Brukselit, e cila njoftoi se vdekja po konsiderohet si “e dyshimtë” dhe është hapur një hetim zyrtar. Në vendngjarje mbërritën policia, laboratori i Policisë Federale Gjyqësore, një mjek ligjor dhe një gjykatës hetues.
Sipas prokurorisë, viktima ishte i varur me një kabllo në pjesën e pasme të tabelës sinjalizuese. Ende është herët për t’u përcaktuar nëse bëhet fjalë për vetëvrasje apo për një ekzekutim të dhunshëm, megjithatë hetuesit nuk përjashtojnë pistën e lidhjes me trafikun e drogës.
Dyshimet për përfshirje në luftën mes bandave
Trupi u gjet në një zonë të njohur si nyje strategjike për trafik droge në Bruksel, jo larg qytetit të Peterbos. Mediat vendase raportojnë se metoda e përdorur ngjan me ato të karteleve meksikane, të cilat njihen për akte makabre me mesazhe paralajmëruese për rivalët.
Një burim i afërt me hetimin u shpreh:
“Nëse konfirmohet lidhja me trafikun e drogës, Brukseli do të përballet me një nivel dhune të paparë më parë.”
Vetë drejtori i Policisë Gjyqësore Federale të Brukselit, Eric Jacobs, kishte paralajmëruar muaj më parë për praninë në kryeqytet të mafias së Marsejës, rrjeteve shqiptare dhe bandave nga Afrika e Veriut, të cilat përdorin metoda brutale: kërcënime, tortura dhe ekzekutime.
