Pas shpërthimit të ndodhur mbrëmjen e 29 nëntorit në portën e banesës së 63-vjeçares Bakie Zoto, në lagjen “Partizani” të Vlorës, vetë e moshuara ka reaguar duke shprehur habinë e saj për ngjarjen. Ajo jeton e vetme dhe thekson se nuk ka pasur asnjë konflikt me persona të tjerë.
“Vetëm jetoj. Erdhi dhe policia. Më shumë u bë tym. Jo fare asnjë konflikt. Kam kaq vite këtu në lagje. Nuk e di, jam habitur dhe vetë”, u shpreh Bakie Zoto për mediat.
Gruaja është nëna e Gentian Zotos, alias Dautaj, i cili ndodhet në burg dhe po vuan një dënim me 35 vite burg për përfshirje në atentatin e ndodhur kundër Inez Hajrullës më 10 maj 2019. Së bashku me Zoton për atentatin ndaj Inez Hajrulla janë dënuar edhe Daut Elmazi, Igli Memaj, Serxho Ademi dhe Albano Goxhaj.
Nga pamjet e siguruara nga vendngjarja, vihet re dëmtimi i fasadës së derës ku ka shpërthyer lënda plasëse. Fatmirësisht, nuk raportohet për të lënduar, por vetëm për dëme materiale.
Ndërkohë, nën drejtimin e Prokurorisë, policia vijon hetimet për identifikimin dhe kapjen e autorëve, si dhe për zbardhjen e plotë të rrethanave të ngjarjes.
