Një sasi tritoli e pashpërthyer është gjetur në hyrje të një hoteli në pronësi të ish-kryebashkiakut të Durrësit, Vangjush Dako. Burime pranë policisë thanë se ishin sinjalizuar përmes një mesazhi se pranë hyrjes së hotelit ishte vendosur një lëndë shpërthyese, e cila pas kontrollit rezultoi e pranishme pikërisht në vendin e sinjalizuar.
Lënda shpërthyese ishte e lidhur me një aparat celular dhe për neutralizimin e saj është kërkuar ndihma e forcave xheniere nga Tirana, të cilat kryen një shpërthim të kontrolluar.
Hoteli ku u gjet tritoli është jashtë funksionit, çka bën që hetuesit të dyshojnë se nuk bëhet fjalë për një tentativë për atentat, por për një mesazh kërcënues ndaj Dakos.
Akuzat ndaj Vangjush Dakos
Vangjush Dako është dënuar me 2 vite e 8 muaj burgim për shpërdorim detyre, ndërsa aktualisht po përballet me Gjykatën e Apelit të Posaçëm.
Ai u hetua nga SPAK lidhur me miratimin e një leje ndërtimi në favor të shoqërisë “Fakle” sh.p.k., pasi ai dhe vartësit e tij kishin përpiluar dokumentet dy vite pasi ndërtimi kishte përfunduar dhe banorët ishin sistemuar në pallat.
Gjithashtu, Dako përballet me një tjetër akuzë lidhur me një procedurë prokurimi për një projekt konsulence, konkretisht:
“Projektim-zbatim për Promenadën Bregdetare dhe Plazhin Publik nga Bërryli deri në Currila”.
Sipas SPAK, komisioni i ngritur me urdhër të Dakos ka gabuar në llogaritjen e fondit limit, duke e përcaktuar atë gati 10 herë më të lartë se sa duhej, në kundërshtim me Vendimin e Këshillit të Ministrave.
